| |
| 23.02.2007: sampions on tour zum letschte hoi zaeme
Ja sisch ziit zum mis letschtae mail zverfasse u eu mini letschte erlaebniss vo dae vergangene wuche zschildere. Sisch alles sehr zackig gange und waenn i so zrug luege isch dziit vergange wie im flug.
Mitlerwiile bini bi minere letschte destination ahcho: i de usa. Sisch aen raechte schock gsi, so nach daene gmuetliche zwei wuche uf dae fiji, wieder i dchelti und in rummel ihztauche. alles da schint so gross zsi und ohni auto isch mer da eifach verlore. aber ebe i muess mi jetzt sowiso zersch chli ahklimatisiere bevor i mi daenn so richtig i die gross amerikanisch waelt use wage.
Jetzt aber zersch mal no schnaell es paar ihdrueck us eme andere egge vo de waelt, naemli us neuseeland und fiji.
Wie ihr ja usem letschte mail haend choene vernaeh, hani mir bi de kiwis au wieder es auto kauft zum das land unsicher zmache u bin schliesslich en teil mit em amerikaner und em aenglaender erkundiget. Nachdem eus de amerikaner dae rugekehrt haet sind de richard und ich wiiter uf dsuechi nach neue wunderschoene plaetzli und sind immer wieder fuendig worde. Allerdings haend alli plaetzli a dere kueste ein ganz grosse minus punkt-es haet tonnewiis sanfluege ume gha. Sisch eus amigs vor cho wie verhaext. mir haend meischtens es plaezli gsuecht i de noechi vom wasser, dass mer eus haend choene waesche am noechste morge(in neuseeland e oeffentlichi duschi zfinde
isch um einiges schwiriger als in australie)
Uf jedefall haend mer eus niderlah, dae richard haet meistens sbett bzw. die gross luftmatraze und eifachs auto fuer dnacht parat gmacht und ich han mal ahfange ihfuere. Jede abig haets oeppis warms zum znacht gaeh wo mer uf em fuerli koecherled haend. doch sobald mir haend ahfange choche, waer het das glaubt, choemed doch die fiicher use und fanged eus a naerfe. (Sandfluege, oeppis vom schlimste, chlini Fluege, aes bizeli groesser als fruchtfluege, schwarz und mit eme chline gschissne ruessel wo de chan biise. s'schlimste aber am ganze isch, das mers gar noed merkt die erschte paar taeg, doch daenn choemed die stisch und sibliibed sicher fuer e wuche oder meh und bised eifach, en richtige horror) Wuerklich schuetze haet mer sich noed choene vor dene. die haend noed reagiert uf antibrumm, kei scheu gha vom rauch oder vom fuer und sind eifach immer so gschisse um dich umegfloge. Seinzige wo gwuerkt haet sind einzig und aleige langi hose und pulis gsi.
Ja das isch gschicht vo de sandfluege aber sisch ebe noni fertig. Waens ebe kei sandfluege umegha haet, sind defuer mosis uftaucht. und die cheibe het i am liebste usgrottet! Die siche haend immer es loch gfunde zum is auto ine cho. dsandfluege haend wenigschtens nume verusse gnaerft aber dmosis...die erst nacht wo mer das bemerkt haend, haets us gseh als muesst emer sterbe. a allne schibe sinds verusse gsaesse und langsahm inne cho. nach dem mer guet 20-30 stuck mit em autodach vereint haend haend mer ufgaeh und eifach probiert zpfuse...und wer het das daenkt. am noechste morge sind alli schoen braf am dach oder a de schiibe ghanged und haend nume gwartet bis sich oeppis tuet. kein eizige stich oder oeppis i de nacht,unglaublich dumi ficher hae, aso so oeppis.
ja das sind wohl oeppe die tier wo mer am meiste gseh haend. abgseh vom possum (ae chlisses komischs bruns vierbeinerli,oeppe so gross wie en marder, frisst wahrschindli alles und isch ae halbi plag in neuseeland) die allerdings haend mer nur immer tot uf em oder am strasserand gseh. (Taeglich werdet um die 250 possums ueberfahre in neuseeland)
Soviel zu de schoene tier waelt in neuseeland. Wie scho erwaehnt isch es noed ganz eifach zum e gratis duschi zfinde usser mer laht sich ih uf chelteri temperature. DAs isch so wies usgseht euses los gsi. Sich zwaesche i mene see oder fluss wo nur es paar grad warm isch,brrrrrr...Eigentli isch es ja summer gsi, aber leider dae cheltischt sit fuefzg jahr, dementschpraechend hald au dluft und dwasser tempereature. Schnaell inegumpe, daenn usse, sich ihsoife (selbstvertueterli mit natuerlich abbaubarem schampoo) wieder inegumpe alles abschwaemme und was gisch was haesch ab zum tuechli und i dsunne. Ja wach bini daenn immer gsi nach dem schwumm und wiiter haets choene gah zum noechste plaetzli.
So sind mer dur dsuedinsle duregreist und haend d'gletscherzunge vom raegewald us gseh, schneeberge mit spiegelglatte baergseeae, fluess wo sich richtig kueste dure schlaengled, grossi langzogni naturfaelder wo vom wind gstreichled werded, steili klippe mit seeleuae und jenstes anderi touriste und reisendi gseh.
Schliesslich nach chli meh als zwei wuche sind mer in picton glandet. Vo det us isch es mit de grosse autofaehri wiiter uebere uf d'nordinsle. hei und das haet tah uf dem kahn...richtig chalti windstuerm sind uebers deck gfaeged und haend die meiste luet vertriibe:)
Daene ahcho, haend mer e super option choene nuetze. dae richard haet uf sinere reis dur asie zwei neuseelaender kaeneglernt und die gfroegt ob mer choenged verbii cho go sali saege. Super guet, villicht wieder mal e super warmi duschi und e schoens bett zum drin pfuse:) Ja und das sali saege haet sich zumene viertaegige ufenthalt entwickled. Das sind ganz liebi luet gsi, um die vierzgi. er isch en fischer und si schaft fuer irgend e organisation. ufjedefall haends eus, chum sind mer ahcho, es hus ahbote sum gratis drine wone fuer en monet, ich han en job offeriert becho fuer e wuche. Zudem het i fuer de neu narnja film choene goge kulisse baue und e chli filmluft schnupere. aber nei das gaht jetzt noed i bin am reise und i muess mis auto wieder go verchaufe das i au ja wiiters chume...
JA du ziit isch au det im flug vergange. nach dene vier taeg sind mer wieder los zoge und richtig aukland lostukerled. Mir sind e chli i dmitti vo de insle und haend eigetli wele go fulkaen ahluege und e chli lava ahlange...aber nei genau a dem tag haet eus swaetter en strich dur draechnig gmacht, dae krater isch schoen i wulche ghuellt gsi derzuae ane haets no pisst, ich het wukli gaern e so en schluck gno vo dere heisse brue, hae ja waennd scho mal i de noechi bisch oder muesch es mal probiere. drum isch es wiiters zu de warme heisse naturliche thermalquaelle gange. Es bizeli wiiter noerdlich sind mer daenn fuendig worde und sind i mene heisse bach go bade. Das wasser det ine haet fast koched, nei aber sisch wuekli chli en witz gsi. normalerwiis haend mer immer zchalts wasser gha und jetzt isch es eifach umgekehrt gsi. No am gliche tag sind mir an ere quelle verbi cho wo swasser mit 94 grad us em bode chunt. scho chli komisch waenn da so dur dlandschaft fahrsch und eifach amigs so dampfwulche gsehsch us em bode ufstige.
Wo mer in Auckland ahcho sind, isch serschte gsi wo mer haend wele mache eusi fanny zwaesche. die isch draeckig gsi wie nur oeppis, haupsaechlich staub vo all dene unbetonierte ueberandstrasse. Doch wo isch daenn um himmelswile mis portmone? wo isch mini taesche mit all mine sache? verdammt, jetzt hani die doch promt i de autobahn raststett vergaesse. ruckzuck sind mer umkehrt und die drueviertelstund zruggfahre. Das isch e adrenalin fahrt gsi. i minere taesche isch alles drine gsi vo pass, gaeld, id, postchaertli bis zur kreditcharte...ja i han andersch gloeggli gha, alles isch no ume gsi a ort und stell...phuuu
Au in Auckland haend mer wieder glueck gha mit de uebernachtigsmoeglichkeit. wiederum sinds am richard sini luet gsi wo eus es dach ueberem chopf, e warmi duschi und food gaeh haend. aber i han zersch mal meusse mis auto verchaufe u wer het das daenkt. innerhalb vo vierezwaenzg stund han i mis auto fuer en guete priis choene a es paar franzose verchaufe und min gaeldbuetel isch wieder volle und parat gsi fuer dfiji. aber bis i han choene wiiterfluege isch es no e gueti wuche gange,hhmmm...
Ihr glaubeds noed, aber i dem halbe jahr bi au ich emal no en flissige gsi. De richard und ich haend fuer es paar taeg choene als "aertner"schaffe. Mir hend enere alte kuenstlerin ihres huus muesse uf fordermah bringe zums verchaufe. dae gruempel wo mir da us dem garte usegschleikt haend, farbchuebel, chinderspielzueg, verrottets zueg...amigs richtig grusig und vorallem haesch immer muesse lueg wo das anelaufsch, ihre hund haet jetzt eifach ueberall choene go schisse wo ner haet wele,jaaakkkk
Es haet mer wenigstens es paar dollars ihbracht au waenn noed grad en hufe. i han fuer 8 NZ Dollars uf d'stund gschafed (oeppe 7CHF) noed schlaecht hae. das isch ja meh als i i minere lehr verdient han:)
Ja nach dene vier taeg schaffe, isch es daenn aentlich wiitersgange wieder i die richtig waermi uf d'Fiji-insle. CHum us em flueger duse, fangst ah schwize und ah abelaufe. Das isch schwuel gsi aber ich han das so richtig gnosse. Ja vo de Fiji gits da hald ebe noed e so wahnsinnig viel zverzelle. I bi die ganz ziit, guet zwei wuche eifach uf ere chline insle,noerdlich vo de hauptinsle,gsi. Und slaebe det isch eifach so gmuetlich und chilled gsi. Dae ganz tag uf de fuule hut lige, mal en schnorchel packe und chli go fischli und koralle ahluege oder hald eifach am strand entlang spaziere. Am abig daenn vereizelt mal es paar schaeleli Kava inehaue und daenn schlafts au no guet...Wie toent das hae, nei sisch eifach wuercklich unglaublich ruig und eifach friedlich gsi.Het ohni wiiteres no es paar wuche meh choene dete umetschille:)
Wie scho gseit bini jetzt wieder im norde, i fruehr mer ad ei...r und sisch eifach e chli grussig grad im moment, aber i muess eu dadevo ja glaub noed viel verzelle, ihr kaenneds ja glaub guet:))
So gaht also mini reis um euse wunderschoen planet zaend. Sisch ae langi ziit gsi wo im flug verbi gange isch. i han vieles erlaebt und wahnsinnig schoeni unberuerti plaezli uf dere waelt gfunde. han neui kulture kaenneglernt und vielfach doerfe feststelle, wie verschiede vieles isch im verglich zur schwiiz. Wie glucklich das mir choend si i dem chline land choene zlaebe.
Sodelidudedelidu das waers daenn so oeppe gsi vo "sampions on tour"
I hoffe i han eu noed zfest glangwiled mit mine romaen,sondern eu eher derzue animiert zum eues buendeli zpacke und i di gross waelt use z'zottle!!!
Hebed ganz e gueti ziit bis daennens und bis gligli dae hei i de schwiiz
dr samuel mutsampions |
|
|
|
